பூங்காற்றுத் திரும்புமா?

பூங்காற்றுத் திரும்புமா?

எடுப்பு!

பூங்காற்றுத் திரும்புமா - இனிப்

புதுவாழ்வும் அரும்புமா?

                                                      (பூங்காற்று)

தொடுப்பு

தீங்கெல்லாம் தீருமா - இன்பத்

தேன்வந்து சேருமா?

                                                      (பூங்காற்று)

முடிப்பு

வேண்டாத சாத்திரங்கள் சாயுமா - மனம்

விரும்பாத வேற்றுமைகள் மாயுமா?

தீண்டாமை எனும்கொடுமை ஓயுமா - உயர்

சீரோங்கும் பொதுநலம் பாயுமா?

                                                      (பூங்காற்று)

கல்லாமை இல்லாமற் போகுமா - பெருங்

கருணைமழை கரைபுரள ஏகுமா?

இல்லாமை இல்லாமை காணுமா - வாழ்வும்

இனிதாகும் நல்லறங்கள் பூணுமா?

                                                      (பூங்காற்று)

பெண்ணாசை மனம்விட்டே அழியுமா - காணும்

பெண்ணடிமை நிலம்விட்டே ஒழியுமா?

பொன்னாசை நமைவிட்டே கழியுமா - நம்

பொதுவுடைமை உலகெங்கும் பொழியுமா?

                                                      (பூங்காற்று)

11.02.2016